Gwamnan Kaduna ya amince a baiwa ma’aikata albashin dubu 72

Gwamnan jihar Kaduna Sanata Uba Sani, ya amince da naira 72,000 a matsayin mafi ƙanƙantar albashi ga ma’aikatan jihar.

A wata sanarwa da sakataren watsa labarai na jihar, Ibraheem Musa ya fitar, ya ce ƙarin zai fara aiki daga watan Nuwamban da ke tafe.

Sanarwar ta ƙara da cewa gwamnan zai kuma samar da motocin sufuri kyauta ga ma’aikatan jihar, ta hanyar ba su motoci guda 100 masu amfani da iskar gas, domin kai su aiki, ya koma da su.