Gidauniya ta za ta mayar da kai wajen koyar da wasanni da samar da ilimi a Najeriya – Dan wasan Dortumnd

Ɗanwasan ƙwallon ƙafa na ƙungiyar Dortmund da ke Jamus, Karim Adeyemi ya buɗe gidauniya a Najeriya.

Adeyemi, wanda yanzu yake wakiltar tawagar ƙasar Jamus, asalinsa ɗan Najeriya, kasancewar mahaifinsa ɗan Najeriya ne.

Ya buɗe gidauniyar ne a birnin Ibadan da ke jihar Oyo, ya ce gidauniyar za ta mayar da hankali kan koyar da wasanni da ilimi.

A kwanakin baya da ya ziyarci Najeriya, Adeyemi ya shaida wa BBC cewa nan gaba yana tunanin komawa taka leda a gasar Premier ta Ingila.

A gasar zakarun turai ta bana, ɗanwasan ya zura ƙwallo uku rigis a ragar ƙungiyar Celtic a wasan da suka fafata.

A game da gidauniyar, ya ce, “na san yadda rayuwa take a nan Najeriya da kuma yadda rayuwa take a Jamus. Na daɗe ina da tunanin idan na samu ɗaukaka ta hanyar ƙwallon ƙafa, zan koma asalina a Najeriya in taimaka wa mutane. Ba zan taɓa mantawa da asalina ba. Wannan babban abin alfahari ne,” in ji shi.