Tsohon gwamnan Kaduna Nasir El-Rufai ya ziyarci tsohon shugaban fadar gwamnatin Kaduna wanda babban amininsa ne da ke tsare a gidan gyara hali dake Kaduna.
Jami’an tsaro sun kama Bashir Saidu Tsohon Hadimin El-Rufa’i a Kaduna ranar Laraba, bisa zargin wai ya yi sama da faɗi da kuɗaɗen jihar lokacin mulkin El-Rufa’i.
Ko da ya ke duk da musanta wannan zarge-zarge da ake masa a kotun Rigasa da ya yi, alkalin Kotun ya hana shi beli yayin da ya yanke masa hukunci zaman gidan kaso na makonni uku.
Rahotanni sun nuna cewa El-Rufai tare da wasu tsoffin kwamishinoninsa, Hafsat Baba,Jaafaru Sani, da Ibrahim Hussaini ne suka ziyarci Saidu a kurkukun.
El-Rufa’i ya shafe mintuna 30 yayin zayarar.
Da yawa daga cikin masu fashin baki a harkar siyasar Kaduna, sun yi tir da wannan kamu da aka yiwa Bashir Saidu, inda suka alaƙanta shi da bibiyar da gwamnatin Kaduna ke yi wa tsoffin na kusa da tsohon gwamnan, El-Rufa’i.
Tun bayan ɗarewarsa gwamnatin Kaduna, Uba Sani ya zargi gwamnatin El-Rufai da handame wasu kuɗaɗen da gwamnatin ta ciwo bashi da sunan yin ayyukan raya kasa.
Wannan zargi ya sa an raba jiha tsakanin magoya bayan yan siyasan.
Lamarin na cigaba da kazanta a halin yanzu inda gwamnatin Uba Sani ta lashi takobin sai ta bankaɗo kamayamayar da aka yi a karkashi gwamnatin El-Rufai da wasu ke ganin da shi a dama a wancan lokaci.
Subscribe to Our VIP Newsletter
[newsletter_signup_form id=1]
