EFCC ta kama mutane 6 masu damfara ta Internet

Date:

February 4, 2023

Jami’an hukumar yaki da masu yi wa tattalin arzikin kasa zagon kasa EFCC, sun kama wasu mutane shida da ake zargi da damfarar yanar gizo a jihar Benue.

Wadanda ake zargin da rundunar shiyyar ta kama a maboyarsu da ke Makurdi, sun hada da Dominic Onea, Daniel Ikwe, Samuel Godwin, John Sule Godwin, David Onaja Egwe da Oche Patrick.

Kamen nasu ya biyo bayan bayanan sirri da aka samu kan zargin da ake musu na damfara ta intanet.

Karanta Wannan: EFCC ta cafke ‘yar fim da ta lika sababbin kudi a wurin biki

An kwato wayoyin hannu guda tara (9), Laptop daya, katin ATM na Zenith daya, saitin WiFi daya da cajar laptop daya.

Hukumar yaki da cin hanci da rashawa ta kara da cewa za a gurfanar da wadanda ake zargin zuwa kotu da zarar an kammala bincike.