Shugaban Kungiyar Tattalin Arzikin Kasashen Yammacin Afirka, ECOWAS, Hukumar Omar Alieu Touray, ya tura tawagar sa ido kan zaben kasar Togo 40 domin sanya ido kan zabukan ‘yan majalisar dokoki da na shiyya-shiyya da aka shirya gudanarwa a ranar 29 ga Afrilun 2024.
Wata sanarwa da kungiyar ta fitar a ranar Lahadin da ta gabata ta ce aikin ya yi daidai da tanadin sashe na 12 na karin ka’idojin dimokaradiyya da shugabanci nagari na kungiyar ECOWAS da ya kunshi goyon bayan kungiyar ga kasashe mambobinta domin gudanar da zabe.
Tsohuwar mataimakiyar shugaban kasar Gambia, Mrs Fatoumata Jallow-Tambajang ce ke jagorantar tawagar.
Tawagar ta kunshi Jakadu daga kasashe mambobin kungiyar ECOWAS, wakilan kotunan shari’a da majalisar dokokin ECOWAS, da kungiyoyin farar hula, kwararrun kafafen yada labarai da kwararrun masu sa ido kan zabe daga yankin yammacin Afirka.
An tura tawagar sa idon ne biyo bayan shawarwarin tawagar tantance gaskiyar zabe da ta ziyarci kasar Togo daga ranar 15 zuwa 20 ga watan Afrilun 2024 domin tantance matakan shirye-shiryen zaben.
A yayin zamanta a Togo, tawagar sa idon za ta yi shawarwari tare da manyan masu ruwa da tsaki a harkar zabe tare da sanya ido kan yadda za a gudanar da zabe har zuwa ranar 29 ga watan Afrilun 2024.
Subscribe to Our VIP Newsletter
[newsletter_signup_form id=1]
