Dole ne a hukunta wadanda suke tallafawa Rasha – Ukraine

Shugaban ƙasar Ukraine, Volodymyr Zelensky ya ce ”harin da Rasha ta kai garin Dobropillya ya nuna cewa har yanzu manufar ba ta sauya ba”.

Shugaban na jawabi ne a matsayin martani kan harin da aka kai yankin gabashin Ukraine cikin daren da ya gabata.

“Don haka yana da kyau mu ci gaba da kare rayukan ƴanƙasarmu da ƙarfafa tsaron sararin samaniyarmu tare da tsananta takunkumai kan Rasha,” kamar yadda ya wallafa a shafinsa na Telegram.

“Duk abin da ke taimaka wa Rasha wajen ɗaukar nauyin yakin nan dole ne a rusa shi” in ji shi.