Wani matashi mai suna Prince Adebayo Ayodeji Temitope, a jihar Oyo da ke kudu maso yammacin Najeriya ya yi yunƙurin kafa tarihin mutumin da ya fi daɗewa yana girki a duniya, bayan da ya yi girkin sa’o’i 200.
Mista Temitope ya fara girkin ne da misalin ƙarfe 6:31 na maraicen ranar Alhamis 9 ga watan Nuwamba, inda ya ƙare a ranar 18 ga watan Nuwamba da misalin ƙarfe 2:31 na dare.
Cikin wata sanarwa da gwamnatin jihar Oyo ta fitar, ta ce tana taya matashin murnar yin wannan bajinta.
A yanzu ana jiran mahukuntan kundin tarihi na ‘Guinness World Record’ su gama tantance ƙoƙarin matashin domin tabbatar masa da tarihin.
A ranar 7 ga watan Nuwamba ne, Kundin Bajintar ya bayyana cewa wani ɗan Ireland, Alan Fisher ya kafa tarihin zama mutumin da ya fi daɗewa yana girki a duniya bayan girkin sa’o’i 119 da minti 57.
Alan Fisher ya doke tarihin da Hilda Baci ‘yar Najeriya ta kafa cikin watan Yuni, bayan da ta shafe sa’a 93 da mintuna 11 tana girki.
Subscribe to Our VIP Newsletter
[newsletter_signup_form id=1]
