Dan kwallon kafa Seedorf ya karbi musulunci

Tsohon fitaccen ɗan wasan ƙwallon ƙafa na Holland Clarence Seedorf ya musulunta, kamar yadda ya sanar a shafinsa na Instagram.

Tsohon ɗan ƙwallon na Ajax da Real Madrid da AC Milan wanda ya lashe kofin zakarun turai sau huɗu ya ce matarsa ce ta musuluntar da shi tare da koyar da shi addinin Islama.

A cikin saƙon da ya wallafa a shafinsa na Instgram inda yake tabbatar musuluntarsa, Seedorf ya bayyana godiya ga matarsa da kuma waɗanda suka tura masa sakwannin murna na shiga addinin musulunci. In ji BBC.

“Ina matuƙar cikin farin ciki da kuma farin cikin kasancewa dukkan ‘yan uwa a fadin duniya musamman masoyiyata Sophia wadda ta karantar da ni ma’anar Musulunci,” kamar yadda Seedorf ya bayyana a shafinsa na Instagram.