Dakarun rundunar hadin gwiwa ta kasa da kasa (MNJTF) da ke aiki a yankin tafkin Chadi sun fatattaki wasu ‘yan ta’adda tare da kwato manyan makamai.
A wata sanarwa da kakakin rundunar MNJTF, Laftanal Kanal Kamarudeen Adegoke, ya fitar a ranar Lahadin da ta gabata, ya ce an samu nasarorin baya-bayan nan ne a sakamakon sabon farmakin da aka kai wa ‘yan ta’adda, mai suna “Operation Harbin Kunama, (Scorpion sting)”.
“Ayyukan da sojojin na MNJTF ke ci gaba da yi ya kara rage karfin ‘yan ta’addan Boko Haram/ISWAP wajen gudanar da ayyukansu a yankin tafkin Chadi.
“Tsarin kai hari da kaurin sojojin na MNJTF ya ci gaba da haifar da sakamako mai ban mamaki.
“Bayan wani hari da ‘yan ta’addar BH/ISWAP suka kai wa sojoji a yankin Arege, wanda aka samu nasarar dakile shi, sojojin rundunar sun yi amfani da karfin tuwo a ranar 11 ga watan Mayu a yankin gaba daya.
Sanarwar ta kara da cewa, an kwato abubuwa da dama da suka hada da bindigar Dushka guda daya, Dushka Turrell da wata motar bindiga da ta kone yayin da aka kashe ‘yan ta’adda da dama yayin arangamar.
Sanarwar ta ce an yi nasarar gudanar da aikin share fage a yankin Ferondiya da ke yankin tafkin Chadi wajen fatattakar ‘yan ta’adda.
Sanarwar ta ce, kayan aikin da aka kwato daga hannun ‘yan ta’addan sun hada da manyan motocin bindiga guda biyu, bindigogin Anti – Aircraft guda biyu, bututun RPG daya, bindigogin AK 47 guda biyu, bam RPG daya da kuma tayoyin motar kirar Toyota Buffalo guda uku.
Sauran su ne zagaye 387 na 12.7mm, 440 na 7.62mm x 54mm da 364 na 7.62mm x 50 mm harsashi.
Subscribe to Our VIP Newsletter
[newsletter_signup_form id=1]
