Rundunar ‘yan sandan Najeriya ta sanar da haramta sanya tufafin da ba a amince da shi ba ga jami’an ta, domin gudanar da ayyuka na yau da kullum.
Sufeto-Janar na ‘yan sandan Najeriya, IGP Usman Alkali Baba ne ya bayyana hakan a wata sanarwa da rundunar ‘yan sandan Najeriya ta wallafa a yammacin ranar Juma’a.
Ya kuma umarci rundunar ‘yan sanda X-Squad da jami’an sa ido, domin tabbatar da aiwatar da umarnin.
Sufeto-Janar na ‘yan sandan Najeriya, IGP Usman Alkali Baba, ya bayyana takaicin sa kan yadda jami’an ‘yan sandan da ke sintiri da masu gadi da tsayawa da bincike da sauran ayyukan ‘yan sanda suka saba wa ka’idar sanya rigar da aka amince da ita a Najeriya.
Ya kara da cewa, a yayin sintiri, jami’an ‘yan sanda sun samu dabi’ar sanya rigar gida da huluna musamman ma, “Jami’ai na musamman, Commando da MOPOL da kuma SCORPION da sauran su yayin da suke bakin aiki”.
Rundunar ‘yan sandan ta bayyana cewa, ta bayar da umarnin cewa, dukkan sassan ’yan sanda musamman na Force Provost Marshal, IGP X-Squad da Monitoring Unit da su tabbatar da aiwatar da tsauraran umarnin tare da sanya takunkumi mai tsanani ga jami’an da suka yi karya doka.
“Dukkan jami’an sa ido za su fuskanci hukunci mai tsanani idan har jami’an da ke karkashinsu suka karya wannan umarni,” in ji shi.
Subscribe to Our VIP Newsletter
[newsletter_signup_form id=1]
