Buhari ka tsoma baki a kan ƙarin kuɗin makaranta – Ƙungiyar Ɗalibai

Ƙungiyar Ɗalibai ta ƙasa NANS, ta buƙaci shugaban ƙasa Muhammadu Buhari, ya yi ”gaggawar sa baki” game da ƙarin kuɗin makaranta da jami’o’in ke shirin yi tun kafin hakan ya janyo matsaloli a faɗin ƙasar”.

Sakataren ƙungiyar na ƙasa Usman Baba Kankia, ya shaida wa BBC cewa ”duk makarantun gwamnatin tarayya sun ƙaƙƙara kuɗaɗe fiye da kashi 250 cikin dari”,

A baya-bayan nan dai an ga yadda wasu daga cikin jami’o’in ƙasar suka bayyana ƙarin kuɗin makaranta.

To sai dai Sakataren ƙungiyar ya ce suna zargin cewa makarantun sun samu umarnin ƙara kuɗin makarantar ne daga sama.

Dalilin ya da sa kenan suka rubuta wasika ga shugaba ƙasa, inda suka buƙace shi a matsayinsa na uba, ya sa baki domin mayar da kuɗin makarantar yadda yake a baya.

Wasu jami’o’in dai sun bayyana cewa sun yi ƙarin kuɗin makarantar ne domin samun damar gudanar da makarantun nasu.

To sai dai ƙungiyar ta ce kundin tarin mulki ya wajabta wa gwamnati samar da ingantaccen ilimi ga ‘yan ƙasa, don haka dole ta samar da kuɗin gudanar da ɓangaren ilimi.

Buhari ya kashe Ilimi zamu yi jana’izarta – NANS

Haka kuma Sakataren na NANS ya ce, ”matuƙar ba a soke ƙarin kuɗin makarantar da aka yi ba, to kashi 40 zuwa 50 cikin 100 na ɗaliban ƙasar ba za su koma makaranta ba, saboda ba za su iya biyan wannan kuɗi ba”.

Abin da kuma a cewarsa zai ƙara yawaitar masu aikata miyagun laifuka a fadin ƙasar saboda rashin makoma da ɗaliban ke da shi.

Mista Kankia ya kuma yi gargaɗin cewar ”matukar buƙatarmu ba ta biya ba, to za mu gudanar da gagarumar zanga-zangar da za ta shafi abubuwa da dama a faɗin kasar nan”.