Wani matashi dan shekara 30 da ake zargin barawon ababen hawa mai suna, Adamu Ali, ya tsallake rijiya da baya a hannun wasu fusatattun matasa a karamar hukumar Dutse ta jihar Jigawa.
Wani mazaunin garin ya shaidawa manema labarai cewa, lamarin ya faru ne a ranar Litinin da misalin karfe 6:00 na yamma a unguwar Yalwawa da ke cikin birnin Dutse.
Ya ce lamarin ya faru ne lokacin da mai motar kirar Honda Civic 98 mai launin toka ya ga wani yana kokarin sace motarsa daga inda ya ajiye ta a kofar gidansa.
Ya bayyana cewa a dalilin haka ne mai motar ya daga karar sannan aka lakada masa duka kafin ’yan sanda su zo su tafi da shi.
Kakakin rundunar ‘yan sandan, DSP Lawan Shiisu Adam ya tabbatar da faruwar lamarin a wata sanarwa da ya raba wa DAILY POST.
A cewarsa, “al’amarin ya faru ne a ranar Litinin, bayan wani Ibrahim Saleh mai unguwar Plot 232 Yalwawa, Dutse ya ruwaito cewa da misalin karfe 1730, ya ajiye motarsa kirar Honda Civic 98 model, mai launin toka, mai lamba GML 112 JA, a cikin gaban gidansa, amma da ya fito, sai ya hangi mutum ya cire motar daga inda ya ajiye ta da wuri.
“Nan da nan sai mai motar ya sanar da ‘yan sandan da ke sintiri da Samariyawa nagari, inda aka bi sawun barawon; saboda haka sai ya bar motar ya ruga cikin wata gona kafin a kama shi aka kai shi ofishin ‘yan sanda domin yi masa tambayoyi.”
Shiisu ya ce an kwato masa key key da lambobin faranti daban-daban guda uku (3).
Ya ce a yayin gudanar da bincike, wanda ake zargin dan asalin garin Potiskum ne na jihar Yobe, ya amsa laifin satar motoci a cikin babban birnin Dutse, kuma kwanan nan ya sace wata mota kirar Honda Civic mai launin kore, mallakin wani Salmanu Adamu Rishi. Takur Site Dutse, Jihar Jigawa da kuma kai shi Jihar Kano.
Kakakin ‘yan sandan ya ce daga baya ‘yan sandan sun kwato motar tare da kawo ta ofishin domin gudanar da bincike mai zurfi.
Ya ce za a gurfanar da wanda ake zargin a gaban kotu idan an kammala bincike.
Subscribe to Our VIP Newsletter
[newsletter_signup_form id=1]
