Mataimakin shugaban majalisar dattawa, Sanata Barau Jibrin ya karbi bakuncin wasu dattawan jam’iyyar PDP masu biyayya ga tsohon gwamnan jihar Kano, Malam Ibrahim Shekarau a hukumance a lokacin da suka sauya sheka zuwa jam’iyyar All Progressives Congress (APC).
Sanata Barau ne ya bayyana hakan a shafin sa na Facebook da aka tabbatar.
“Na karbi tawagar dattawan jam’iyyar PDP, wadanda ke sansanin tsohon gwamnan jihar Kano, Malam Ibrahim Shekarau, zuwa babbar jam’iyyarmu – APC,” in ji Sanata Barau, wanda ke nuna wani gagarumin sauyi a fagen siyasar yankin.
Masu sauya shekar, karkashin jagorancin Hon. Lawan Abubakar Tsanyawa, ya hada da fitattun mutane kamar ’yan majalisar Shura, kwamandojin Hisbah, da tsaffin ‘yan majalisa, da tsaffin shugabannin kananan hukumomi. Sun bayyana ficewar su ne a lokacin da suka kai ziyara gidan Sanata Barau da ke Abuja. Karamin ministan gidaje da raya birane, Hon. Yusuf Abdullahi Ata shi ma ya shiga karbar kungiyar.
A nasa jawabin, Sanata Barau ya bayyana irin rawar da jam’iyyar APC ta taka wajen tsara shawarar da masu sauya shekar suka dauka, inda ya nuna gamsuwarsu da irin gudunmawar da jam’iyyar ke bayarwa wajen samar da ababen more rayuwa, karfafawa da samar da ayyukan yi a fadin yankin. “Ko da a matsayinsu na ‘yan PDP, sun ce sun amfana sosai daga ayyukan da muka yi a bangaren samar da ababen more rayuwa, karfafawa mutane, ayyukan yi, da sauran fannoni, hakan ne ya sa suka yanke shawarar komawa APC,” Barau ya bayyana.
Sanata Barau ya kuma tabbatar wa da sabbin ‘ya’yan jam’iyyar yadda za su shiga cikin jam’iyyar.
“Su ba baki bane a jam’iyyar APC, sun kasance mambobi ne kafin su bi shugabansu zuwa PDP, yanzu da muka sake haduwa za a yi musu adalci da daidaito,” inji shi.
A wani labarin kuma, Sanata Barau ya karbi bakuncin wata tawaga daga jam’iyyar New Nigeria People’s Party (NNPP) a karamar hukumar Bichi, karkashin jagorancin tsohon shugaban kansila, Alhaji Saleh Rabiu Yusuf (DanGwarzo).
‘Yan jam’iyyar NNPP sun bayyana tasirin ayyukan da jam’iyyar APC ke yi da kuma sahihancin shugabancin jam’iyyar a matsayin muhimman abubuwan da suka sa suka yanke shawarar shiga jam’iyya mai mulki.
Subscribe to Our VIP Newsletter
[newsletter_signup_form id=1]
