Bulaliyar Majalisar Dattawa, Dakta Orji Uzor Kalu, ya yi kira ga jam’iyyar All Progressives Congress (APC) da ta bayyana tsarin shiyya-shiyya na jam’iyyar gabanin zaben fidda gwani na shekarar 2023.
Ya kuma kara nanata cewa zai tsaya takarar kujerar shugaban kasa ne kawai idan jam’iyyar APC ta maida shi yankin Kudu maso Gabas.
Kalu a wata sanarwa da ya fitar a Abuja, ya ce, samar da tsarin raba jam’iyyar APC a bainar jama’a ya zama dole, domin hakan zai taimaka wajen jagorantar masu neman tsayawa takara a kan turbar da ta dace da kuma daidai da bukatun jam’iyyar.
Kalu ya ce: “Yayin da zaben fidda gwani na shugaban kasa ke gabatowa, batun shiyya-shiyya ya sake zama a tsakiya, kuma kamar yadda aka saba, ana cece-kuce. Jam’iyyar na shirin samar da fom na mukamai daban-daban don haka yana da kyau jam’iyyar a cikin gaggawa ta bayyana shirinta na shiyya-shiyya na masu son tsayawa takara.
“Bayyana ofisoshi na da matukar muhimmanci domin ba wai kawai zai nuna haske a kan turbar ‘yan takara ba, har ma zai ceci jam’iyyar daga rashin jituwar da ba dole ba da kuma kararraki bayan kammala zaben fidda gwani.
Subscribe to Our VIP Newsletter
[newsletter_signup_form id=1]
