An sanya dokar takaita zirga-zirga a Katsina da Jigawa

Sakamakon tarzomar da ta tashi a lokacin zanga-zangar nuna rashin amincewa da tsadar rayuwa da aka gudanar a sassa daban daban na Najeriya a jiya alhamis, gwamnatin jihar Jigawa ta sanya dokar hana fita ta sa’o’i 24 har zuwa lokacin da al’amuran tsaro suka inganta.

Gwamnan jihar Jigawa Umar Namadi wanda ya bayanna haka ya ce sun ɗauki wannan mataki ne sakamakon abubuwan da suka biyo baya a zanga zangar waɗanda suka haɗa da sace sace da lalata kayan hukuma.

Ita ma gwamnatin jihar Katsina ta sanya dokar hana fita na sa’o’i 24 a ƙaramar hukumar Dutsima, yayinda ta hana zirga-zirgar mutane daga ƙarfe bakwai na yamma zuwa ƙarfe bakwai na safe a sauran ƙananan hukumomin 33 da ke jihar.