Wata hatsaniya a kauyen Zaranda da ke karamar hukumar Toro na jihar Bauci, ta janyo mutuwar mutum ɗaya da kuma jikkata wasu da dama.
Cikin wata sanawar da mai magana da yawun ƴansandan jihar, Ahmed Wakili ya fitar, ta ce an jikkata mutum uku daga garin Zaranda a rikicin.
Lamarin ya faru ne da misalin ƙarfe 9 na safiyar Talata, lokacin da mazauna garin suka fito domin nuna fushi kan wani mai sayar da gawayi da aka kama, kamar yadda rahotonni suka ruwaito.
Zanga-zangar da suka fito domin nuna ɓacin-ransu ta kuma saka ƙungiyar maharba da tabbatar da tsaro harba bindigogi a sama.
Wakili ya ce an garzaya da su zuwa cibiyar kiwon lafiya a garin, inda Allah ya yi wa ɗaya daga cikinsu mai suna Yahaya cikawa.
Kwamishinan ƴansanda a jihar, Auwal Muhammad, ya bayar da umarnin gudanar da cikakken bincike kan mutuwar Yahaya da kuma abin da wasu jami’an tsaro da ke cikin lamarin suka aikata.
“Tuni muka ɗauki mataki domin shawo kan lamarin da gudanar da bincike, sannan mu gabatar da waɗanda suka aikata wannan abu,” in ji sanarwar ƴansandan.
Sanarwar ta kuma ce an aika tawagar jami’an tsaro zuwa wurin da lamarin ya faru domin mayar da doka da oda da kuma sake buɗe hanyar da mazauna garin suka toshe.
Subscribe to Our VIP Newsletter
[newsletter_signup_form id=1]
