Majiyoyin da dama a cikin Rasha sun ce an kashe Janar Yaroslav Moskalik, mataimakin babban jami’in gudanarwa na hafsan hafsoshin sojin ƙasar, bayan an dasa masa bam a motarsa a birnin Moscow.
Kamfanin dillancin labaran TASS ya rawaito cewa jami’an tsaro sun tabbatar da cewa wani bam ne ya haddasa fashewar wani abu a yankin gabashin birnin Moscow na Balashikha.
Kwamitin bincike na Rasha ya tabbatar da mutuwar Janar Yaroslav Moskalik a wani fashewa da aka yi a birnin Moscow.
Da ta ke tsokaci game da kisan, mai magana da yawun kwamitin binciken Svetlana Petrenko ta ce: “Wata mota ƙirar Golf ta fashe bayan wani bam da aka dasa acikinta ya tashi.”
Wannan dai ba shi ne karon farko da ake kai wa wasu sojojin Rasha hari ba tun farkon yaƙin amma ba kasafai ake samun kashe kashen da ake yi a birnin Moscow ba.
A watan Fabrairun wannan shekarar, Armen Sargsyan, shugaban wata ƙungiyar sa-kai da ke goyon bayan Rasha a gabashin Ukraine, ya mutu a asibiti bayan da wani abu ya fashe a kofar shiga wani rukunin gidaje da ke arewa maso yammacin Moscow.
Subscribe to Our VIP Newsletter
[newsletter_signup_form id=1]
