Runduna ta daya ta sojin Najeriya ta ce, dakarunta sun kashe wani dan bindiga tare da kwato makamai da alburusai a Sabon Birni da ke karamar hukumar Igabi a jihar Kaduna.
Mukaddashin daraktan hulda da jama’a na sashin, Laftanal Kanal Musa Yahaya, ne ya bayyana hakan a wata sanarwa da ya fitar, inda ya ce lamarin ya faru ne a ranar 17 ga watan Disamba, lokacin da sojoji suka yi wa wasu ‘yan bindiga kwanton bauna a yankin.
Yahaya ya ce sojojin sun kwato bindiga kirar AK-47 guda daya da mujalla dauke da alburusai 15 na 7.62mm (musamman) da gidan rediyon baofeng da wayoyin Tecno guda biyu.
“Dakarun runduna sun sake kai wani samame a kan hanyar Dende-Buruku a karamar hukumar Chikun ta jihar Kaduna a ranar 15 ga watan Disamba, sun yi wa wasu ‘yan fashi kwanton bauna.
“A yayin farmakin, ‘yan bindiga da dama sun tsere da raunukan harbin bindiga yayin da sojoji suka kwato bindiga kirar AK-47 guda daya da kuma Mujallar bindigu ta AK-47 dauke da harsashi 7.62mm (musamman) guda hudu,” in ji shi.
A cewarsa, babban hafsan rundunar, wanda kuma shi ne kwamandan rundunar ‘Operation WHIRL PUNCH’, Maj-Gen Valentine Okoro, ya yaba wa sojojin bisa jajircewar da suka yi.
Ya bukace su da su ci gaba da hana ‘yan fashi da ‘yan ta’adda da duk wani mai laifi ‘yancin gudanar da ayyukansu.
Subscribe to Our VIP Newsletter
[newsletter_signup_form id=1]
