Wata kotu a kasar Sweden ta tuhumi wata mata ‘yar kasar da aikata laifukan yaki saboda ta taimaka wajen sanya danta mai shekaru 12 a matsayin sojan a kasar Syria, inda a ka kashe shi a yakin basasar da su ke tafkawa.
Kamfanin dilancin labarai na Reuters ya rawaito cewa, matar mai shekaru 49, ‘yar kasar Sweden da ta dawo daga kasar Syria a shekarar 2020, ita ce mutum ta farko da a ka sani da a ka tuhume ta a Sweden da laifin taimakawa daukar karamin danta a matsayin soja.
Yaron, wanda a ka haifa a shekara ta 2001, ya fara gwagwarmaya ne tun a shekara ta 2013, domin shiga kungiyoyin da su ka hada da na IS. Ya kuma mutu a cikin shekarar 2017, sai dai hukumomi ba su fitar da wani karin bayani game da mahaifiyar ko ɗanta ba.
A zaman kotu na ranar Talatar nan, matar ta musanta zargin, ta hannun lauyanta, Mikael Westerlund.
Sai dai kotun ta ce har Idan a ka same ta da laifi za ta fuskanci hukuncin daurin shekaru hudu a gidan yari, inji mai gabatar da kara Reena Devgun.
A cewar Majalisar Dinkin Duniya, daukar yara ‘yan kasa da shekaru 15 aiki da kuma amfani da su a matsayin sojoji haramun ne a karkashin dokar jin kai ta kasa da kasa, kuma kotun hukunta manyan laifuka ta kasa da kasa ta amince da shi a matsayin laifin yaki.
A karkashin dokar Sweden, kotuna na iya yi wa mutane shari’a da laifukan da su ka saba wa dokokin kasa da kasa da a ka aikata a kasashen waje. Za kuma a ci gaba da shari’ar ne a ranar Litinin 10 ga watan Janairu.
Subscribe to Our VIP Newsletter
[newsletter_signup_form id=1]
