Hukumar Yaki da yi wa Tattalin Arziki Tu’annati (EFCC) tare da hadin guiwar Hukumar Tsaro da Civil Defence na Jihar Kwara (NSCDC) da Hukumar Kula da Ma’adanai da Karfe ta Tarayya, sun kama wasu mutane 13 da ake zargin masu hakar ma’adanai ba bisa ka’ida ba ne da ke aiki a kauyen Kakafu a Karamar hukumar Patgi dake jihar Kwara.
Wadanda ake zargin, kamar yadda binciken THISDAY ta rawaito, an kama su ne a ranar Talatar da ta gabata a wani samame na hadin gwiwa.
An tattaro cewa an samu nasarar cafke shi ne biyo bayan sahihan bayanan sirri da hukumar EFCC ta samu kan wasu da ake zargin masu hakar ma’adinai ba bisa ka’ida ba ne da ke gudanar da ayyukansu a yankin.
Idan dai za a iya tunawa, rundunar shiyar Ilorin na EFCC da NSCDC a jihar Kwara a ranar Alhamis din da ta gabata ta kara zage damtse wajen yaki da hako ma’adinai ba bisa ka’ida ba a jihar.
Wata sanarwa da aka fitar jiya a Ilorin mai dauke da sa hannun jami’in hulda da jama’a na hukumar tsaro ta farin kaya, Mista Olasunkanmi Ayeni, ta bayyana cewa: An kama wadanda ake zargin sun hada da, Buba Mohammed, Yusuf Umar, Surajo Shehu, Abubakar Abdullahi, Salisu Mohammed, Quadri Sulaiman. da Nwafor Chinonso.
“Sauran su ne: Abdullahi Isa, Mustapha Mohammed, Buhari Hassan, Basiru Jafaru, Murtala Jafaru da Jafaru Abdullahi.”
Sanarwar ta kara da cewa, an samu nasarar kwato manyan motoci biyar cike da ma’adanai daban-daban daga hannun wadanda ake zargin.
“Bincike na farko ya nuna cewa wadanda ake zargin ba sa biyan gwamnatin tarayya hakkokinsu kamar yadda doka ta tanada.”
Sai dai sanarwar ta bayyana cewa: “Ba da jimawa ba za a gurfanar da wadanda ake zargin a gaban kotu bayan kammala binciken da ake yi.”
Subscribe to Our VIP Newsletter
[newsletter_signup_form id=1]
