‘Yan sanda sun cafke uku daga cikin wadanda ake zargi da yin fashi da makami da suka tsere, wadanda suka kashe mutum daya a wani hari da suka kai a kasuwar waya ta Abeokuta a jihar Ogun.
Lamarin ya faru ne a ranar 12 ga watan Afrilu ne ‘yan bindigar suka kai farmaki kasuwar waya wadda aka fi sani da Tarmarc, inda suka kashe daya daga cikin ‘yan kasuwar, Dayo Bankole, tare da kwashe wayoyi masu tsada da yawa. Daya daga cikin ‘yan fashin mai suna Sakiru Adeniji, an kama shi a wurin da laifin ya faru, yayin da wasu suka tsere.
Jami’in hulda da jama’a na rundunar ‘yan sandan jihar Ogun, Abimbola Oyeyemi, ya bayyana wadanda ake zargin Ajayi Kayode, Habeeb Idowu, da Temitayo Oresanya.
Jami’an ‘yan sanda daga reshen Kemta sun cafke wadanda ake zargin ne biyo bayan samun labarin cewa wadanda ake zargin na yin sintiri a unguwar Abule Ake da ke Abeokuta domin gujewa kama su.
Da samun labarin, DPO na sashin Kemta, CSP Adeniyi Adekunle, ya tara mutanensa zuwa wurin da aka damke mutanen uku.
“Biyu daga cikin wadanda ake zargin sun amsa laifinsu da hannu a harin na fashin, yayin da na uku, Temitayo Oresanya, wanda ya tabbatar da cewa dan kungiyar asiri ne tare da su, ya yi ikirarin cewa bai shiga harin na fashin ba,” in ji Oyeyemi.
Oresanya ya shaida wa ‘yan sanda cewa sauran biyun sun zo gidansa “domin buya daga ‘yan sanda bayan tserewa fashin da suka yi.”
A halin da ake ciki, kwamishinan ‘yan sandan jihar Ogun, Olanrewaju Oladimeji, ya bayar da umarnin mika wadanda ake zargin zuwa hukumar CIID ta jihar nan take. Ya kuma ba da umarnin a kamo sauran ‘yan kungiyar tare da gurfanar da su gaban kuliya.
Subscribe to Our VIP Newsletter
[newsletter_signup_form id=1]
