Gwamnan jihar Kano ya sake gabatar da wani kwarya-kwaryan kasafin kudi ranar Talata na naira biliyan 24 a gaban majalisar dokokin jihar Kano don neman amincewarta.
Abba Kabir ya gabatar da rokon ne a cikin wata wasika da shugaban majalisar dokokin jihar, Isma’il Falgore ya karanta a zaman majalisar na yau.
Isma’il Falgore ya ce gwamnan ya nemi amincewar majalisar ne kamar yadda sashe na 122 karamin sashe na (A) da (B) na tsarin mulkin 1999 ya tanada.
Ya ce, “kudurin kwarya-kwaryan kasafin kudin na shekara ta 2023 a karo na byu, ya zama dole saboda wasu dalilai daga ciki har da kudaden da jihar ke sa ran samu daga kwamitin rabon kudade na asusun tarayya da harajin VAT da asusun kula da zaizayar kasa da harajin EMTL da kudaden rance na ayyukan samar da lantarki mai zaman kansa daga Babban Bankin Najeriya da kuma karin kudin shiga na cikin gida”.
Gwamnan ya ce bisa la’akari da wadannan bukatu da kuma muradin aiwatar da wasu muhimman ayyukan raya kasa na gaggawa a cikin jihar, an gabatar da kudurin kasafin kudin a kan bangarorin da suka hadar da biyan kudaden garatuti da naira biliyan hudu.
Akwai kuma kashe naira biliyan 20 a kan manyan ayyuka.
A cewarsa da karin kwarya-kwaryan kasafin kudin naira biliyan 58 da kuma na naira biliyan 24, kasafin kudin jihar Kano na shekara ta 2023 a yanzu ya kai naira biliyan 350.
Subscribe to Our VIP Newsletter
[newsletter_signup_form id=1]
