Abdullahi Sani Abacha, daya daga cikin ‘ya’yan marigayi shugaban mulkin sojan Najeriya, Sani Abacha ya rasu.
Majiyar ‘yan uwa ta tabbatar da rasuwar Abdullahi ga POLITICS NIGERIA a ranar Asabar, inda suka ce, an wayi gari a gidan danginsa na Nelson Mandela Street Abuja , ya rasu bayan ya kwanta bacci.
“Ya kasance cikin farin ciki da jin dadi a daren jiya amma an same gawarsa a safiyar yau. Ya rasu cikin kwanciyar hankali a cikin barcinsa,” wata majiya ta ce.
Dan uwansa, Mahmud Abacha, dan na hudu ga marigayi Abacha, shi ma ya tabbatar da wannan labari mai ban tausayi a wani sako da ya wallafa.
“Na rasa dan uwana Abdullahi. Allah ya jikansa da rahama a Jannatil Firdaus,” inji shi.
Jaridar ta tattaro cewa za a gudanar da sallar jana’izar da misalin karfe 4 na yamma a babban masallacin kasa dake Abuja a yammacin yau (Asabar).
An haife shi a shekarar 1987, marigayin yana daya daga cikin ‘ya’ya 10 da marigayi shugaban soji ya bari.
Subscribe to Our VIP Newsletter
[newsletter_signup_form id=1]
