Gwamnan jihar Katsina, Aminu Bello Masari, ya ja hankalin al’ummar jihar da su yi amfani da makamai domin tunkarar ‘yan bindiga da ke addabar su.
A cewar gwamnan yayin zantawa da manema labarai ya ce, jami’an tsaro kadai ba za su iya magance matsalar rashin tsaro a jihar ba.
Da ya ke jawabi yayin wani taron manema labarai a Katsina, Masari ya jaddada cewa yawan jami’an tsaro a jihar bai isa a shawo kan lamarin ba.
“A Musulunci ya halatta mutum ya kare kansa daga harin. Dole ne mutum ya tashi ya kare kansa, da iyalansa, da dukiyarsa. Idan ka mutu ka na ƙoƙarin kare kanka, za a ɗauke ka a matsayin shahidi. Abin mamaki ne yadda dan fashi zai mallaki bindiga alhali mutumin kirki da ke kokarin kare kansa da iyalansa ba shi da ita”.
Ya kuma yi nuni da cewa gwamnatin jihar za ta taimaka wa masu shirin mallakar makamai, domin kawo karshen matsalar ‘yan fashi da makami a jihar.
“Za mu goyi bayan wadanda su ka zo da shirin sayo makamai, saboda mazauna yankin na bukatar su kara kaimi ga kokarin hukumomin tsaro. Wadannan mutane (jami’an tsaro) ba su da yawan da za su kare jama’a.
“Lokacin da Shugaba Buhari ya zo, har ma ya yi kokarin kara yawan jami’an tsaron mu, amma abin bai wadatar ba. Ku lissafa kanku, ‘yan sanda nawa mu ke da su a kasar nan? Sojoji nawa mu ke da su?
“Ko da mu ka ce kowane dan sanda ya koma jiharsa, ba zai wadatar ba. Domin haka, idan mu ka ninke hannu mu ka yanke shawarar yin komai, za mu fi shan wahala”. Inji shi.
Masari ya ce,”‘Yan sanda za su yi rijistar duk bindigogin da mazauna garin su ka saya, domin tabbatar da an yi amfani da su yadda ya kamata. Katsina, kamar sauran jihohin Arewa maso Yamma, Zamfara, Kaduna, Sokoto, da Kebbi, sun sha fama da hare-haren kungiyoyin ‘yan ta’adda”. A cewar Masari
Rahotanni na nuni da cewa, Daruruwan mutane ne a ka kashe ko kuma a ka yi garkuwa da su a Katsina cikin wannan shekara tare da raba dubbai daga gidajen su.
Subscribe to Our VIP Newsletter
[newsletter_signup_form id=1]
